UBroos Akaxolanga Ngesibini SeSundowns

Umqeqeshi weBafana Bafana uHugo Broos akanaxhala kodwa akaxolanga ngoTeboho Mokoena noKhuliso Mudau – uthi bazakudlala neCongo-Brazzaville.

Esi sibini asidlali rhoqo kwiMamelodi Sundowns ngaphantsi kukaManqoba Mngqithi kodwa uBroos akanavalo, uthi aba badlali basafana nakuqala.

Ngaphambi kokudlala neUganda neSouth Sudan ngenyanga ephelile, uMudau noMokoena bebedlala rhoqo kwiSundowns kodwa zajika izinto.

Bathe nje ukubuya kwabo kulomidlalo yeBafana, bahlaliswa ngaphandle kodwa uMudau wafumana imizuzu bequbisene neKaizer Chiefs kwinyanga ephelile.

FUNDA NALAPHA: UMorena: IBafana Inxanelwe Igazi LeCongo

Akukho mathandabuzo ukuba isigqibo sikaMngqithi siwabeke emngciphekweni amathuba esi sibini ikakhulu kwiqela lesizwe kodwa uBroos usakholelwa kuso.

UBroos uthethe kanje ngaphambi komdlalo wabo neCongo ozakubanjelwa eNelson Mandela Bay eGqeberha ngolwesihlanu kusihlwa.

“Ngokubona kwam, uMokoena noMudau basafana nakuqala. Le ngxaki ijongene neqela labo iSundowns kodwa nathi iyasibandakanya,” utsho uBroos.

“Kuyafuneka ndisamnkele isigqibo seqela nomqeqeshi uManqoba Mngqithi kodwa andisivisisi.

“Ndingumqeqeshi weqela lesizwe, eyona nto endingayenza kukuba ndamnkele isigqibo seSundowns kodwa andivumelani naso.

FUNDA NALAPHA: Usenomvandedwa Ngamanqaku Bedlala NeBrazil

“Andikwazi ukuvisisa ukuba kutheni uMudau noMokoena bengadlaliswa – ngabadlali abanesakhono yaye zizitshixo kodwa sibona sebengadlaliswa.

“UTeboho noKhuliso ngabadlali endibathembileyo yaye kuzakuhlala kunjalo, kodwa ke, ukuba imeko yabo ayiguquki, abazukwazi ukusinika esikufunayo kwiBafana.

“Likhona ixesha lokuthabatha izigqibo ngabo kodwa andiyicingi lonto okwangoku.”