‘Soze Ndiqeqeshe Elinye Iqela KwiPSL’ – Riveiro

BETWAY PREM – Umqeqeshi oshiye iOrlando Pirates uJose Riveiro uthi soze aqeqeshe elinye iqela kwiPSL ngaphandle kweziMnyama.

URiveiro ukhululwe yiPirates ngaphambi komdlalo wabo neGolden Arrows ngolwesibini koweligi nalapho bephumelele ngamanqaku amathathu eqandeni.

Lomdlalo ububanjelwe kwibala iOrlando ibingowokumbhabhayisa uRiveiro okhonjwa kwiAl Ahly eYiphutha.

Amanqaku weziMnyama afakwe nguKabelo Dlamini, uTshegofatsa Mabasa kunye noBandile Shandu njengokuba bevale umtyhi kwiMamelodi Sundowns.

FUNDA NALAPHA: Uyashiya URiveiro KwezaseSoweto IPirates

Ephawula ngekamva lakhe emva komdlalo, elikhankatha laseSpain lithe liyayihlonipha iPirates yaye soze lizibone likwelinye iqela.

Kusenjalo, walile ukuthetha ngekamva lakhe nangona amarhe ethe ndii okokuba usayine neenkunzi zaseCairo iminyaka emibini.

“Andikwazi kuqeqesha elinye iqela apha eMzantsi Afrika, soze. Mna ndizakuhlala ndixhasa iPirates, Once and Always,” utshilo kwabeendaba.

“Soze ndiqeqeshe elinye kwiPSL, ndizakuhlala ndiliBhakaniya.

“IOrlando Pirates liqela elizakuhlala lindinika amandla nenkuthazo, andikwazi ukuzibona ndiqeqesha elinye iqela.”

Emva kokufika engaziwa eMzantsi Afrika, uRiveiro uthe wazakhela udumo nalapho ephumelele iindebe ezintathu zeMTN8 ngokulandelelana nezimbini zeNedbank Cup.

FUNDA NALAPHA: Ishota Ngenqaku ISundowns Iphamakise Indebe Yesibhozo

Iindaba eziphuma eMntla-Afrika zidiza ukuba uRiveiro angahle aqeshwe yiAhly ethatha indawo kaMarcel Koller kwakuleveki.

“Ndiyabawela ukunixelela ukuba ndiyaphi kodwa andikwazi. Ezi zinto ziyimfihlelo, ayindim ekufuneka ndiyichazile lonto,” uyachaza.

“Kodwa ikamva lam lizakwaziwa kungekudala. Ndicinga ukuba wonke umntu uyavisisa yaye bandivuyele – bandinqwenelele okuhle.”