Yimincili eMzantsi UMbatha Ehlangula IBafana EJuba
Kuluvuyo eMzantsi Afrika iBafana Bafana iphumelela umdlalo wayo ibetha iSouth Sudan ngo3-2 ngenjikalanga yangolwesibini.
Lomdlalo wokuzibekela indawo kwitumente yeCAF African Cup of Nations eMorocco ngo2025 ububanjelwe kwibala iJuba National Stadium, eSouth Sudan.
EzikaHugo Broos zize kulomdlalo emva kokubambana ngamanqaku kowokuqala kulemidlalo neUganda ngolwesihlanu kwibala iOrlando Stadium – lomdlalo waphela zibambene ngo2-2.
Njengoba lendedeba yaseBelgium yenze iinguquko emdlalweni wabo nalapho efake uSipho Chaine endaweni kanozinti uVeli Mothwa – iBafana iqale ngomfutho yabonakalisa ukungxama.
FUNDA NALAPHA: OweDawana Akalali Obuhlayo Ngobungozi BePirates
Nangona bedlale kakuhle njengokuba bebonakalise ubungozi, abasingathi balomdlalo ngabo ababone kuqala umnatha.
Umdlali wangasemva uSiyabonga Ngezana wohlulekile ukumelana namendu kaTito Odong Okello, unompepe wakhomba emlotheni nalapho lefolosi ithe yayivalela ngomzuzu we15.
Kwiinzame zokulinganisa, iBafana ibonakalise ubungozi nalapho iinzame zabo ziye zavuzwa xa uOswin Apollis evalela inqaku lokuqala lomdlalo ngomzuzu wama20.
Lomfana odlala kwiPolokwane City ukwazile ukubonakalisa ukuphola phakathi ebhokisini emva kwebhola ayifumene kuAubrey Modiba eqabangeni lasekhohlo.
Kwimizuzwana ngaphambi kokuya ekhefini, uApollis uphinde wayophisa iSouth Sudan apho egqibzele ibhola kumzamo wabo omhle. 2-1.
Iqhubekile iBafana ukulwa ifuna ukuqhekaza oludonga luluqilima, uModiba udubule ibhola enobungozi kodwa unozinti weSouth Sudan uMajak Mawith uvale amazibuko.
Emva kwesiqingatha sokuqala, iBafana iqhubekile apho iyeke khona, uRelebohile Mofokeng uzamile naye kodwa ibhola yakhe yavalwa nguMawith.
Kusenjalo, abatyeleli bohlulekile ukulungisa udonga lwabo emva, uValentino Yuel wabonzakalisa emva kwempithizelo ebhokisini. 2-2.
Elityendyana leOrlando Pirates uMofokeng lizifumane endaweni entle ngomzuzu wama75, kodwa ibhola yakhe yabethwa ngulonozinti uMawith.
Nanjengokuba bokubonakala lomdlalo uzakuphela zintanganye, uphakamise isandla uThalente Mbatha wahlangula ezikaBroos ngomzuzu wokugqibela.
FUNDA NALAPHA: BAFANA: UBroos Akaphumi Egusheni NgoMothwa
Lomfo weziMnyama uphinde umsebenzi omhle awenze bedlala neeCranes ngolwesihlanu eSoweto.
Xa sigxelesha indlela ezime ngayo kwiqela elifakwe kuK (Group K), iBafana inamanqaku amane emva kweUganda ekwindawo yokuqala.
Lamaqela abambene ngamanqaku kodwa ezikaPaul Put zingentla ngenxa yamanqaku angene kuzo njengoba iBafana ingenelwe ngamane emva kwemidlalo emibini.
