URamoreboli WeGalaxy Ufungele IPirates – ‘Asinavalo’
Ikhankatha leJwaneng Galaxy uMorena Ramoreboli uthi abanavalo lokuqubisana neOrlando Pirates ngomgqibelo kwelaseBotswana.
IPirates ityelela iGalaxy ijonge ukubuyisa isixhiba kumdlalo weCAF Champions League ngenjikalanga yangoMgqibelo.
Kodwa umqeqeshi uRamoreboli uthi bazimisele ukulwa yaye abayoyiki iPirates ekhokelwa nguJose Riveiro.
Xa sijonga umdlalo ongaphambili phakathi kwezinkunzi, iGalaxy yatywatyusha eziMnyama ngamapenalti kwakuletumente kulomnyaka ophelile.
FUNDA NALAPHA: ‘Asiboyiki’ – UMabasa Akanavalo Ngobungozi BeJwaneng
Encokola nephephandaba iDiski Times kuleveki, lomqeqeshi ozalwa eMzantsi Afrika kwiphondo iFreyistata uthi bajongene nengxaki kodwa bakulungele oko.
“Amalungiselelo ahamba kakuhle okwangoku, abadlali banomoya ophezulu ngumfutho njengokuba sidlala nePirates,” utsho lomqeqeshi.
“Ndiyakholwa ukuba sijongene nengxaki yanyakenye njengoba benabadlali ababuya kwimidlalo yamazwe ngamazwe abafana noOlisa Ndah, Relebohile Mofokeng, Thalente Mbatha noNkosinathi Sibisi.
“Nathi ke sijongene nalomeko kodwa ndinethemba lokuba singaqhuba kakuhle kulomdlalo. Ngabo abangaphantsi koxinzelelo.
“Kunyanzelekile balibethe iqela elincinci kubo. Uyakhumbula sababetha kulesizini egqithile.
“Umbuzo ke ngowokuba sikulungele ukulwa, ewe kunjalo. Siyaboyika na? Hayi.”
FUNDA NALAPHA: Uvuyo KuBroos NgoMbatha, Unethemba KweyeAFCON
Eqhuba lomqeqeshi okhe waxhuzula imikhala kwiBloemfontein Celtic nakwiBafana Bafana kwitumente yeCOSAFA uthi iPirates inabadlali abayingozi.
“Kuninzi okutshintshile kwiqela lePirates esadlala nayo ngaphambili. UNdabayithethwa Ndlondlo wayedlala, uDeon Hotto wayengadlali emva,” utsho uRamoreboli.
“Ngoku banabadlali abatsha emva njengoNdah noThabiso Sesane. UMofokeng uqhuba kakuhle. Ukhumbule noTshegofatso Mabasa wayengadlali – lilonke liqela elitshintshile eli.
“Ndiyathemba Kodwa ukuba sizakwazi ukubona abalandeli abaninzi ukgwitha bona.”
Lomdlalo ubekelwe intsimbi yesine kumabala aseBotswana National Stadium ngomgqibelo.
